स्वप्नापलिकडची एव्हरेस्ट वारी भाग -11 तेंगबोचे ते दिंगबोचे.. रोमहर्षक प्रवास!
तेंगबोचेमध्ये पाऊल ठेवताच, सर्वप्रथम टी-हाऊस गाठून सामान ठेवले, फ्रेश झालो आणि लगेचच तेंगबोचे मॉनेस्ट्रीकडे निघालो.समुद्रसपाटीपासून तब्बल 3,867 मी उंचीवर, सोलुखुंबू जिल्ह्यातील खुम्बू प्रदेशात ही मॉनेस्ट्री दिमाखात उभी आहे. दूधकोसी आणि इमजा खोला नद्यांच्या संगमावरील एका टेकडीवर वसलेल्या या मॉनेस्ट्रीला ‘गेटवे टू एव्हरेस्ट’ असेही म्हटले जाते.
मुख्य प्रवेशद्वार अत्यंत रंगीबेरंगी आणि तिबेटी कलाकुसरीने नटलेले आहे. प्रवेशद्वाराच्या अगदी वर, मध्यभागी असलेले 'धर्मचक्र' आणि त्याच्या दोन्ही बाजूंना बसलेली दोन हरणे भगवान बुद्धांनी सारनाथ येथे दिलेल्या पहिल्या उपदेशाची-धम्मचक्र प्रवर्तन आठवण करून देतात.
मॉनेस्ट्रीच्या गर्भगृहात अतिशय सुंदर, देखणी आणि भारदस्त अशी बुद्धांची सोनेरी मूर्ती डोळ्यांचे पारणे फेडते. आतील भिंतींवर कोरलेली अप्रतिम चित्रे पाहत आम्ही तिथे काही वेळ ध्यानस्थ बसलो. शांतता आणि ऊर्जेचा तो अनुभव शब्दातीत होता.
मोकळ्या समतल जमिनीनंतर चढण सुरू झाली. वाटेत पांढऱ्या आणि गुलाबी 'ऱ्होडोडेंड्रॉन' फुलांची दाट वनराई लागली. फुलांमधून मध गोळा करणाऱ्या मधमाश्या आणि उंच झाडाच्या शेंड्यावर बसलेला 'ग्रोसबिक' पक्षी निसर्गाचे जिवंत सौंदर्य दाखवत होते.
जसजसे आम्ही वर जात होतो, तसतशी झाडांची उंची कमी होऊन ती झुडपांमध्ये बदलली. काही ठिकाणी जमीन एवढी कोरडी आणि ढासळलेली होती की जणू चंद्रावरील जमिनीवरून चालत असल्याचा भास होत होता. खाली दरीतून वाहणाऱ्या पाण्याचा खळखळाट 'उथळ पाण्याला खळखळाट फार' या म्हणीची प्रकर्षाने आठवण करून देत होता.
आज अथकपणे 12 किमीचालणे झाले होते. त्यासाठी जवळपास सव्वा सहा तासात 1745 ऊर्जा खर्ची पडलेली. अखेर दुपारी दीड वाजता, 4330 मी उंचीवरील 'दिंगबोचे' या सुंदर गावात आम्ही सुखरूप पोहोचलो होतो.
©️®️ - कुसुमानंद
9403464101
Comments
Post a Comment